D.Tramp "Zəngəzur dəhlizi"nin Ermənistandan keçən hissəsinin 99 illiyə Birləşmiş Ştatlara verilməsi ilə bağlı saziş imzalandığını bildirib. "Beynəlxalq sülh və rifah üçün Tramp marşrutu" (TRIPP) adlanacaq bu yol Azərbaycanın əsas hissəsini Naxçıvan eksklavı ilə birləşdirəcək.
D.Tramp Azərbaycana hərbi yardıma qadağanın da qaldırıldığını deyib. Prezident Əliyev buna görə Trampa təşəkkürünü bildirib.
""907-ci düzəliş" 33 ildən sonra bu gün ləğv olundu", - İ.Əliyev deyib.
"Daha müharibə olmayacaq. Övladlarımız öldürülməyəcək. Yollar ayrılmayacaq, açılacaq. Regionda bütün yollar və sərhədlər açılacaq". Bunu Ermənistan parlamentinin spikeri Alen Simonyan Facebook səhifəsində yazıb.
Donald Tramp jurnalistlərin erməni məhbuslarla bağlı suallarını cavabsız qoyub.
Ermənistan Qarabağdakı keçmiş separatçı rejimin təmsilçiləri də daxil olmaqla Bakıda saxlanan ermənistanlıları "siyasi məhbus" adlandırır, onlara azadlıq tələb edir. Hazırda keçmiş separatçı rejim təmsilçiləri bir sıra ittihamlarla mühakimə olunurlar.
Vaşinqtonda yerləşən "Freedom Now" insan haqları qrupu Tramp administrasiyasını Əliyevlə görüş imkanından yararlanaraq "geniş yayılmış insan haqları pozuntuları" barədə narahatlığını bildirməyə, 375 siyasi məhbusa azadlıq tələb etməyə çağırıb.